SERIAL tiatrantlo ek dekhavo Angela, Anthony San, Nevel ani Sanny De Maina chitrar distat

Amchim tornattim kolejimni pavtoch, tanchea jivitant vegllench varem marunk lagta. Thoddea tornatteanchem mon tanchea xikpacher thir urta ,zalear kaim tornatteanchem lokx choddxem cheddea-cheddvancher veta. Aplem kolejichem xikop kortanach tanchea kallzamni mogachi kitt pett’ta. Ekleachi mogachi kitt perouta zalear heranchi thoddea kallan palovta. Ekleachea kallzant vomplolem bim dusreachea kallzant kirlotoch tornatteam modem sanvronaslolim bodlopam ghoddttat. Hea bodlopanmni konn jikhot ani konnak har poddot, hem sangunk borench moskil zata.

Hea tornatteancho tornno mog monant khelloit fanki tiatrist C. D. Silvan aplea penacho SERIAL nanvacho tiatr loka somor manddla. Ruzario (Sanny de Maina) haka tegam bhurgim - vhoddlo put Eddy (Anthony San) dusro Jude (Nevel) ani eklich dhuv Berna (Maria). Tacho ho lhan ponn mozbut ghorabo ekamekachea mogan hansun-khellun ani fokannam korun aple dis sartat. Ruzaricho dusro borea sobhavacho ani heranchea gorzam akantak pavpi put, aplea kallzant tachea borobor xikpi Frenzy (Angela) hachea gupit mogan lasta. Teach borobor hea Frenzycho mog ani eklo duxtt sobhavacho xikpi Walton (Ali) taka aplea pagerant faraunk koxei toren taka aplem korunk soglloch hurhurta. Oxe he dogui kombe ekamasachea kuddkeak Frenzyk ghansavnk sodhtat. Tedna chukun ho masacho kuddko Eddychea ghansant poddtta. He dogui kombe zhogddunkuch urtat. Te dogui fosovtat ani Eddy, Frenzy him dogaim kazar zaun aplo novo ghorabo ghoddttat.

To Ruzaricho put Nevel Frenzychea mogache sintiment bhogta torui aplea bhava thaim koslench vaittponn dhorinastana jieunk vavurta, ponn temam khellpi duxtt Walton xevott porian Frenzyk aplem korunk mervachi dhavnni gheta. Miguel ho Frenzycho bapui apli dhuv jea ghorant kazar zalea, tea ghorant aplem thikann korta. Tim suretam ghalun zoxim khoddpam foddun uddoitat te porim tancho mozbut ghorabo foddun uddoitat. Ani Eddy Frenzyche khoxe pormonnem Berna eka Vicky (Jack Rodson) mhonnlolea kodde kazar zatoch, tacho xevott ujeant lhasun gobor zata.

SERIAL tiatrant dor eklo kolokar Sanny de Maina, Anthony San Jack Rodson , Maria, Angela, ani Ali apli bhumika vevosthiti ritin kortat. Hea xivai Jack de Colva, Inacio ani khas SERIAL tiatracho digdorspi C. D’Silva aple komikentlean lokak boroch hansoita. Ho SERIAL tiatr mhonnttoch, Jack Rodson ani Maria hannim Goeant ghoddlole eke ghoddnnecher adharun gailolem kantar lokak borench avoddlem. Amche put-dhuvo aplea avoi-bapaik pejechea nisak vollvollaitat tim zannttim zatoch tanchoi tosloch xevott zatolo oxem A. Friend-an aplea kantaran lokak bori xikoun dili dekhun lokak aplea talleanchea goddgoddit avazan taka porot apouncho poddlo. Leslie ani Jack de Colva Izddin mhonn gailolem kantar lokak khup avoddlem. SERIAL tiatrant ghov aple bailek lasun marta to dekhavo manddun haddunk C. D’Silvan khup thokos ghetla mhonn gomta. Taka amchim porbim.

“ KONNENCH LOZCHEM NHOI ”
KONNENCH LOZCHEM NHOI tiatrantlo ek dekhavoAntonette, Menino Mario ani Irene chitrar distat.Aplo vavr kosloi lhan vo kirkoll to zanv apunn koslo vavr korta, hem heram mon’xank nhoi zalear aplea ghorcheank tori sangchem hem sangunk konnench lozchem nhoi . He vixim bhangarachea talleacho Menino Mario aplea KONNENCH LOZCHEM NHOI tiatrantlean bhov korun loz bhidda dhortelea dor eka Goenkarak bori xikovn dita. Konnench Lozchem Nhoi tiatrachi kotha Golfant kam’ kortelea kitleach Goenkarank sarki lagta. Hea khell tiatrachi kotha oxi : Valeriecho bapui aple eklech dhuvecho fuddar porzollit zanvcho mhunn Golfachi vatt dhorta. Ho bapui Golfant vochpache vatter astana apunn Golfant pavtoch eke vhoddle nokrek astolo hea khatir jea cheddea thaim tem kazar zatalem ani ho cheddo magit titli dot apunn ditolo mhunn cheddvak bhasavnni divn veta. Tachem cheddum Valerie aplo bapui dilolem utor palltolo hea bhorvanxean nhovreak zai titli dot magunk huskaita. Tacho nhovro Reese aple khuxe bhair ani dot magunk apleak Valerie forsar korta dekhun tachich khuxi korta. Tacho bapui Golfant pavtoch atthvench kitem taka gho-ddtta.To thoim eke bore nokrek mhunn gelolo astana te nokre bodlek unttam rakhpa-chem to kam’ korta. To fosovta ani dhuv-echea fuddarachem chintun khuxe bhair kam’ korunk lagta. Apunn Golfant koslem kam’ korta hem Valeriek gomot zalear tachea bhorvanxeacho churo zatolo mhunn chintun aplea kamachi khobor to konnakuch sangona. Dusre vatten pollet zalear Sam nanvacho kazari dadlo manager-che nokrek mhonn Golfant gelolo tovui fosta ani eka Arabachea ghorant ek chakor koso kam’ korta ani tea ghorant lhan legit chukik lagun taka tachea dhoniacho kaklut nastana mar khanvcho poddta. Apunn kirkoll kam’ korta mhonn aple bailek gomlear ti apleak soddun vochunk xokta; oslim gorje bhailim chintnam ievzun - apunn eka Arabachea ghorant kam’ korta mhonn bailek sangonastana dovorta. Tachi bail Simran, aplo ghov Golfant eke benkint manager-achi sirvis korta mhunn somzun ghovan dhaddlole koxttanche tache duddu apleak zai toxe khorchita. Apunn Golfant koslem kam’ korta hem aplea ghorcheank sangonatana gupit dovortat dekhun donui ghorabeamni ghoddbodd zata.

Menino Mario hannnem oxe torecho veglloch vixoi loka somor dovrun boro sondex dila. KONNENCH LOZCHEM NHOI tiatrant Valerie-chi bhumika Antonette ani Simran-chem kam’ Irene bore toren kortat. Menino Mario (Sam) ani Trindade bapaichea kamant borech rongovtat ani tiatracho dorzo ubarun dhortat. Hea xivai Aurelio(Reese) ani Xavier Gomes apleak dileli bhumika sadhi-sudhi korun lokachea kallzant bhortat. Eka vorixtt ranant zoso ragan koddlolo vag boballtta toso Collin arab zaun bhumika korta tedna tiatrak odikuch rong ieta. KONNENCH LOZCHEM NHOI tiatrant komiddi korpi Filipe Almeida (render) hea rendrachi dhuv Janet ani tacho mogi Peter D’Costa lokak hansovn khuxal dovortat. Hea tiatrant survatecho dekhavo dolleant bhorpa sarko zala zalear aple dhuvechea kazarak dot ektthaim korunk Valeriecho bapui chori kelea uprant choriek sampoddta ani arab tacho hat katrun uddoita ani hat katortoch hatacheo foddafoddi to bhogta ho dekhavo ekdomuch nazuk dista. Hea khatir Menino Mariok khorench xabaski favo.
- Ives Tavares

F. Almeida ani tachi cheddva-bailechi bhumika

Halinchea kallar zomnivelea khellamni cheddvam-bailanchim nhesnnam ghalun tiatrist apli bhumika kortale. Bail mon’xechim angavlim aple kuddir choddoitoch tanchea jivak ek vegllich khuxalkai bhogtali. Him angvostram ghalun bhogleli khuxalkai ghevn te khellamni odikuch urben kam’ kortale ani lokak umedhir dovortale ani aplea khellachea digdorspeakui borem nanv zoddun ditale. Osoloch ek nanvosto cheddvam-bailanchim nhesnnam ghalun khellachea mogiank pixem lavpi mhollear F. Almeida. F. Almeida ho fanki tiatrst Filipe Almeidacho bapui.
F. Almeida
Eka kallar aple bhumikek dhozta tea pormonnem cheddvam- bailanchim nhesnnam ghalun kola korpi F. Almeida aiz meren ganvant zavpi bhurgeanchea tiatramni toslinch svongam korta. Atam tornnatte tiatrist ani cheddvam-bailanchim nhesnnam ghalun bhumika korcho kall urunk na, to kall bodol’la punn F. Almeida aple kola thaim mat bodlonk na. F. Almeida eka khellant sunechi bhumika kelea uprant dusrea tiatrant dhuvechi ani avoichi bhumika kortalo. Taka kantaram gavpacho ek kherit gunn aslo ani ho tacho gunn choddso Jack De Varca hachea vangdda “Duet” gaitana distalo. “Sukh Uddon Gelem” C. D’Costa, Antonio S., Jerry Fernandes, Pri. Planton Faria, C. D’Silva adi. hanchea tiatramni tannem bhag ghetla. Oxem astana X. Almeidachea “Time pass” nanvachea Konknni cholchitrant F. Almeida-cho mottea promannan aspav asa. Tanchea Kolvenchea ganvant bhurgeanche tiatr zatat, oslea somoiar Romam Dias-chea sangata to tornne umedhin kantaram gaita. Tiatr ani khell tiatramni tizlolo F. Almeida atth vorsancho astana Konknni palkar bhumika korunk laglo. Atam to 73 piraier pavla torui Konknni palk soboita.
- Ives Tavares

Moratthi nattkacho Konknnint tiatr RUPNNEM
RUPNNEM khell-tiatrantlo ek dekhavoAiz pasun machier ailole tiatr vo khell-tiatr he khas tea-tea khell boroupeanche asle. Punn Konknni tiatrachea itihasant poilech pavtt Konknni palkacho nanvosto vinodhi kolakar ani tiatrist Prince Jacob hea season-ant tiatracho veglloch proiog ghevn tiatr pollennaram mukhar aila. Sahi re Sahi hem Kedar Shinde hannem boroilelem moratthi nattok jem Maharaxttrant boreach nettan cholta, tacho Prince Jacoban Konknnintlean onnkar korun RUPNNEM nanvcho khell-tiatr korun machier dakhounk survat kelea. RUPNNEM hea khell-tiatracho poilo proiog Junhache 4ter, Ponnjechea Kola Akademint zalo. Ho proiog suru zaunk ek hor asa mhollear soglleoch tiketteo khopun, boreach lokank niraxi zaun ghora portochem poddlem.
Prince Jacob hache sangnne pormonnem, dusrea bhasantli girest borpavoll tiatr pollennaranchea mukhar dovrop hoch hea RUPNNEM khell-tiatracho hetu. Tiatrache machier khuinchi-i borpavoll tea-tea borovpeachi khaxa oxi nhoi zalear, tea tiatrak vo khell-tiatrak tiatr pollennaranche nodrentlean choddxem ies favo zaina. Torui astana, Prince Jacoban ek dhaddxi pavl marun moratthi nattkacho Konknni tiatr kela. RUPNNEM ho tiatr zorui mullant moratthi nattkacho onnkar aslo, torui astana tiatrachea svorupant sador korpacho proitn aslolean hea khell-tiatrant 6 kantaram asat.
Prince Jacoban machier haddlolo RUPNNEM ho novo khell-tiatr Seagram India he komponin sponsor kela.
RUPNNEM hea tiatrak thavn survat korun aiz meren Prince Jacoban 36 khell-tiatr boroun, somazak mhotvache ani dekhiche sondex dileat.
- Ives Tavares