Mhaka pulisechi
bhumika korunk khup avoddta:
Aurelio
Mon’xachea soimbantuch
kola aslear amchean bore kolakar zaum ietat mhonn mandun ghetole zaitech zann
asat.
Amche modem zaite zann asat tankam apunn ek dis vhodd kolakar zatolo mhonn
sopnant porian dislem na, ani aplea rogtant kolakaracho gunn asa mhonn tannim
ollkhunk naslem. Torui astana te aiz vhodd kolakar zaunk pavle. Devan amkam
hea sonvsarant ojeapam korpache gunn dileat. Te amich ustun ani sanspun
polleunk zai. Aplea jivitacho sodh korta to monis kedna tori aplea jivitachem
bhangar kelea xivai fattim urchona.
Halinchea vorsamni Aurelio D’Silvan kitleach khell-tiatramni kelolea
bhumikamni porzoll’lolo disun ailam. Tache kolent khaxelo bodol ghoddun
haddpacho proitn kelolo dista. Aurelio bhumika kortana tiatr polletolo lok
aplem lokx tacheruch ghalun ravta. Halinchea tiatramni tannem dotorachi,
pulisachi, aisfrutt vikpeachi, ghorkarachi, oxeo sabar torecheo sobo sarkeo
bhumika Aureliobaban korun tiatr polletoleanchim kallzam jikhun ghetleant.
To Kolvenchea fanki tiatrist Menino Mariocho bhav. Survatek tannem aplea bhava
Menino Mario-chea khell tiatramni podd’ddea fattlean ravun tiatr machiechi
vevostha korpachem kam’ kortalo. Oxem khup kall kelea uprant tachea rogtant
aslolo tiatracho gunn voir sorunk laglo. Taka tiatracho gunn asa mhonn tachea
bhava Meninak gomlem ani apleach “Adim Tum Atam Hanv” hea tiatrant lhanxi
bhumika korunk taka soeg dilo. Ho soeg gheun tiatr machier Aurelio ek vag koso
machier ubo ravlo ani soglea lokak tannem ojapaile. Hache uprant Dev zannam,
ghontter, Tukach Tople, Devachim Bhurgim, Mai-Paiche Anvdde, Vadoll, Devak Zai
Zalear hea khell-tiatramni Aurelion kam’ kelem. Devachim Bhurgim tiatrant eka
padd mon’xachi bhumika tannem keli. Vaittovea mon’xachi bhumika kortana
Aurelion vaitt kam’ kortolea mon’xancher sarkoch thorthoro haddlo. To
gavpantui boroch huxar asa. Retir, Devosanv hea kesettimni Menino Mario-cho
godd modur avaz aikum ieta. Podd’ddea fattlean ravun vavurtolo ek dis Konknni
machiecho khoddegant khambo zatolo mhonn kednach tannem chintunk na.
Aploch sodh korpi monis kedo vhodd zannar zait mhonn konnachean sangum ieta?
Aurelio D’Silva Konknni machier odhik nettan vavrun noketra porim porzollunk
amche anvdde.
Rebekachea surar vazoupi songitkar Alcantra Baros
Sabar avazamni songit aikunk zata. Sogllea avazamni
songit astach. Suknneancho, relgaddiecho, udkachea lharancho, zhumzhumit
xitoll vareacho, girnnicho, iontrancho, panvlancho, oxe torechea avzamni
songit aikum ieta. Tachea sadantleant songit rochum ieta. Fokot songitkaran
aple kan ugte dovrunk zai. Tednach tachean novlanchem songit rochun haddum
ieta. Alcantra Baros, soglleanche ollkhicho aple kan ugte dovrun songit
aikotalo, heach karannak lagun Alcantra ek vhodd namnecho songitkar zavnk
pavlo. 1986, Juanv Paul II Goeant itihasik bhett dili, hea somoiar misak
survatechem git “mon’xam modem mon’xam modlo” aslem, hem git khas Alcantra
Baros-an rochlolem. Aiz hem git Geonchea songit suran rupantor zalolem asa.
Soglleant sogllo mhonnlolea porim igorjechea songitant mottea promannan tacho
pattimbo asa. Hea Devachea bhurgeanchim gitam geleant sfurthi ani jivak anond
bhogta toslem sompeponnim lokachean ganvk zata oslea nadar bosoilole sur
Alcantra Barosan rochlole asat. 1917 vorsa, 13 Mars hea disa Alcantra Baros
Vell’llechea ganvant zolmolo. Tacho bapui Vevsaien, rebek vazovpi songitkar
Mumboichea “silent picture house” aplem vazoup kortalo. Alcantra bhurgo aslo
ani taka songit khup avoddtalem. Songit avoddtalem dekhunuch Alcantrababan
rebek vazovnk chintlem. Alcantra Baros Solfez xiklo ani songit xastr xiktoch
tache kodde ek lhanxem rebek aslem tem rebek ghevn to vazounk laglo. Aplem kan
sodanch songitak to ugte dovortalo. Mumbai, Bandra, St Stanislaus iskolant
tannem songitak survat dili ani hachea uprant Bharoti udent songit (East
Indian) orchestra zomeant bhorti zalo. Alcantra Baros bhurgeachponnar savn
sogllo bhar ghevn ani kan ugte dovrun aplem vazovp kortalo. Hea uprant aplo
boro sonvsar zanvcho mhonnon Alcantra Baros udent Afrikek gelo ani hanga
tachea borea vazovpak lagun loka koddchean taka ghonnghonit xabaski favo zali.
Alcantrabab Tanzania, Kenya ani Uganda hea desamni bhonvddi kelea. Hea
Afrikechea desant Idi Amin zuttier ietoch Alcantra Baros Goem ailo. Vell’lle
ganvant kednai pavot zalear motor-saikol ghevn bazar korunk ailolo dixtti
poddtta. Taka tachi pirai asa khori tori tachea angant tornatteponn rosrosta.
Goa - Bombay Musical Show
Kormonnuk (entertainment) aichea kallar amchea jivitacho mhotvacho bhag zala.
Kormonnuke khatir ami kitlei pois vetanv. Monachem somadhan korunk. Halinch
Tony Dias-acho Goa-Bombay Musical Show lokamni pollelo ani aplea monachem
somadhan korun ghetlem. Hea show-ant Goenchea toxench Mumboichea tiatristamni
bhag ghevn ho musical show boroch rongoilo. Goa-Bombay Musical Show-ant
dorjedar ani bori xikovnn dita toslim kantaram aikunk mell’lim. Joe Rose ani
Betty Naz hanchem Charismatik Antti kantar, aichea kallar retirank vochpi
ostoreank bori xikovnn divpa sarkem aslem. Kennybaban ostorechea bhesan
gailolim Taka Dum, Vozon 96 ani Ai-ka Dajiba (Joe Rose-a sangata) him tinui
kantaram lokanchea tonddar hanso khelloitana distalim. Bab Andrew hachem
Birmot kantar aiktoleak kholaien chintunk laita toslem aslem. Menino Mario
hannem gailolem Jezuk Melo ani Lawrychem Dusreachem him gitam somazak bori
xikovnn divpi thorlim. Jr. Rod-achem Amerika kantar borem aslem. Zeemix
trikuttachim Amchea Bapa ani Maim him gitam borea divirtimentachim aslim.
Zalear S. Lemos hachem Rag nanvachem kantar dor ekleachea jivitak xikovnn
divpa sarkem aslem. London xarant jietole Goenkar Konknni uloitat ani
Londonche Goenkar Konknni uloitoch jivak veglloch sontos bhogta. Tor Goeant
Konknni uloi, Konknni boroi ani Konknnitlean sorkar choloi mhonn Menino Mario
ani Felcy aplea Konknni Uloi kantarantlean lokank budh ditat ti tokhnnai korpa
sarki asa. Goa-Bombay Musical Show fokot kantaramnich vinnlolo aslo oxem nhoi.
Tantunt odim-modim vinodhui aslo. Irene, Mario de Vasku, Sally, Janet, Philipe
Almeida ani Menino mario lokank hanspachim pil’lam divn umedhir dovortalim.
Goa-Bombay Musical Show Conny-chea asrea khal Tony Dias hannem ghoddun haddlo
tachi ami tondd bhorun tust kortanv.
TO TUKA SANDDINA
Bor& Dir: Teotonio D’ Costa
Bhurgeank avoi-bapaicho mog zai. Hea avoi-bapaichea mogan aple bhonvtonnchem
padd vatavoronn bhurgim mogachea bhavnnamni bhorunk xoktat. Bhurgeank
avoi-bapaicho mog gorjecho. Avoi-bapaichea mornna vorvim bhurgeank zaite pavtt
mog chukta. Hea chuklolea mogak lagun thoddea bhurgenachem jivit eka padd
oronnea sarkem zata thoim jivit divpi tankam udokui na, ani tollmollaupi
khotkhotit suriachea kirnnank vattavnk savlli-i na. Torui jivitant dongor
kampun hal’lear halum, porvot kosllun poddlear poddum, Dev tuka sanddina.
To Tuka Sanddina Teotonio D’ Costababan boroilolo novoch tiatr halinchea
disamni Goenchea sabar ganvamni gazlo. Hea tiatrantli kotha mon uskaita. To
Tuka Sanddina aple bhitor gillun gheta.
H ea tiatrant xikpa sarkem khub asa. Thomas ho tornnatto avoi-bapaichea mornna
uprant taka soglleamnich bhairailo. Thomas ani Nirmala him avoi-bapaichim
dogam bhurgim. Tancho avoi-bapui mortoch, dogaim poristhitik lagun ekameka
sorxil’lim pois urtat. Tantuntlean tim ekamekachi ollokh ani natem visortat.
Oso tancher vaitt vell ietoch, vaitt vell tancher aplem raj choloita. Ani
rogot rogtak ollkhona zatoch Thomas ani Nirmala dogaim ekamekacher kolpotat.
Xevttim Thomasak Nirmala apli khas rogtachi bhoinn mhonn gomtoch Jezuk
nakarlolea Pedru bhaxen Thomas dukhamni roddtta ani aple vaitt okllhun aplech
bhoinn thaim vaittachi mafi magta. Hea tiatrant, Dashrath Naik panch toranchi
bhumika korta ani hea panchui bhumikamni to porzolltta, zalear vinodhi bhagant
Markus Fernandes utrancheo katkutleo korun lokak hansoita. Hea tiatrantlim
thoddim kantaram soddlim zalear her kantaram sumarachim aslim. Bizlechi
vevostha bori asli. Shanker-ak xabasi ani bab Teotonio D’ Costa-kui amchi
xabaski.
Paskank C. D’Silvacho novo show
Man of Thousand Faces tiatrist C. D’Silva Paskanchea kallant Serial ho aplo
novo show machier haddpacho asa.Serial show vegllech torecho zatolo mhonn C.
D’Silva sangta. Atam zaiteach kallan tiatrak boro vixoi mevla oxem D’Silva
mhonntta.
Ives Tavares
http://www.v-ixtt.com/tiatrache_machier.html