M.DOD DE VERNA
==============

Khoddegantt Tiatr Borovpi ani Voznadik Gitam Rochpi.

Saxttichea Nagoa, Verna ganvant 1933 vorsa,
Novembrache 2 tarkher Miguel Santana Dourado ho babulo
zolmolo. To Xri Domingos Rosario Dourado ani Xmti Ana
Maria Dourado hancho put.

M. Dod bhurgeponnant huxar aslo. Segundo Grau (chovtho
vorg) porian Purtugezint xikun uprant to Inglezint
xikxonn gheunk laglo. 6vi iot'ta poriant xiklo.

M. Dodak lhan piraieruch gavpachi kola asli. To
apunnuch kantaram ghodd-ttalo ani svadik tallean tim
gaitalo.

1952 vorsa, bhov nanvlo-kik tiatrist Minguel Rod
hachea eka tiatrant “Ama-teurs” Kolakaram khatir
Konknni kantaranchi spor-dha (competition)” asli.
Tantunt zaitea novea gavpeamni vantto ghetlolo. Te
spordhent M. Dod de Verna hea tornnattean bhag ghetlo.
Tannem “Xezari” nanvachem kantar gailem. Te spordhent
to poilem inam' jikhlo. Te uprant fan-kivont C.
Alvaresachea tiatrant gavpachi spordha asli. Tantuntui
M. Dodan bhag ghelto. Tachea gitak poilem inam' favo
zalem. Uprant to boro gavpi mhonn Mumboi xarantui
lokache avddicho zalo. Uprant Mumboiche nanvazte
tiatrist taka tiatramni ghalpak lagle. Mumboichea
bhovtek soglea tiatristanchea tiatramni to ‘nachla’
ani sodanch borem nanv zoddunk pavla.

M. Dodan aplo poilo tiatr boroilo to “Bhognnar”.
Tannem to aplea ganvant, ganvcheach tornnatteank
ghevn, machier haddlo. Punn to titlo boro zaunk nam.

M. Dod Mumboi gelo ani tannem M. Boyeracho sangat
zoddlo. Boyerachea digdorxona khal M. Dodan to
“Bhognnar” tiatr tea xarant dakhoilo. Ani to thoim
ekdom' boro utthlo.

M. Dod machier ietanch prekxok tallio marun taka boro
ievkar ditale. To tiatr-pollennarancho borech avddicho
zal'lo. Tachea poilea tiatrak lagun taka Mumboichea
Konknni ani Inglez potramni boroch vakhannlo. To chodd
chodd nanvlokik zata toso toso tachi urba ani umed
vaddot geli. Tannem sabar tiatr boroile ani machier
dakhoile.

Goeant toxem Mumboint tache he tiatr chodd nama'na
zoddunk pavle: “Bhognnar” (1956), “Honrad Tarvotti”
(1957), “Ghatkeak Ghat” (1958), “Soirikar Salu”
(1959), “Motlobi Podon” (1959), “Kallzacho Anvddo”
(1959), “No Vacancy” (1963), “Thevoi Thomas” (1965),
“Obrigasanv vo Devosanv” (1967), “Ghoracho Divo”,
“Goenchi Mati”, “Ghottallo”, “Moriad”, “Rinnkari vo
Bhikari”. He nim'nne panch tiatr 1967 vorsa boroilole.


“Young Stars of Goa” hea pongddacho M. Dod de Verna ek
khoddegantt khambo aslo. Tosoch to voznadik tiatr
boroinnar ani digdorspi. Borea vixoiancher to borim
kantaram ghoddpi ani boro gavpi. Devan taka suadik
tallo dil'lo. Aplea godd avazan to aikopeank sodanch
khuxal dovortalo. Tachem kantar borem zalam dekhun
prekxok taka portun gavpak apoitale tedna taka chodd
anond zatalo. Zor tachem ek kantar dusre pavtti gavunk
taka lokan apounk naslo zalear tem to dusrea tiatrant
anik gainaslo. Tachim gitam sodanch mannsugechim
astalim. Tim lokak chodd avoddttalim ani talliancho
khollkholl korun dusre pavtti gavpak taka apoitale.

M.Dodak sor korpa sarko tiatrist atam Konknni machier
disonam. To aplea tiatrant sodanch 16 kantaram
—ekoddem (klaun), duet, trio ani chovko—ghaltalo. To
vividh vixoiancher kantaram rochtalo. To dusrea
tiatristanchea tiatramni bhag ghetalo ani dusreacho
tiatr aploch zalole porim borea rongar haddttalo.
Tachim sabar kantaram asat punn him chodd probhavi ani
lokik zaleat” “Kamdar”, “Tandull”, “Don Anne”, “Ulovp
Dusmanachem”, “Beij Magta”, “Mainchem Dukh”, “Fugar
Zatam”, “Xetanchi Pavnni”, “Ginean Naslole”,
“Simiterint”, “Xembor Bhattam”, “Mumboiche Vostad”,
“Bhirankull Voram”, “Noko Aslolo Monis”, “Sant
Filomena”, adi.

M.Dodan zaitea novea kolakarank machier haddleat. Bai
Platilda ani Aires hea bhavddank tannem tiatrant gitam
gaunk soeg dilo. Tanchea vangdda to trio gaitalo.

M. Dod Akaxvannichea Goem Kendracho kolakar mhonnunui
kam’ kortalo. Akaxvannicher tannem sabar gitam
gaileant ani tim azun aikunk mellttat. Tacho bhav
Denny Dod tiatramni vinodi gitam gavpi. Tannem kaim
tiatrui borovn machier dakhoileat.

M.Dodan bore tiatr borovn ani te machier dakhovn
nam’na zoddlea.

1964 vorsa tannem Saib Rocha hea adlea tiatristachea
“Dubhavi Ghorkarn” tiatrachem digdorxon korun to
Goeant ani Mumboint dakhoilolo.

M.Dodacho nimanno tiastr “Sot’techo Ganv” . Hea
tiatrache tannem fokot chear `porde’ boroilole. Tacho
urlolo bhag Nelson Afonsan boroilo ani tannench tachem
digdorxon korun Goeant ani Mumboint dakhoilo.

“Young Stars Of Goa” pongddachea “ Moriad” hea
tiatrant M.Dod boroch lokik zal’lo. Duetam to sodanch
Sabina baie sangatak gaitalo.

1970 vorsa Febrerache 21ver Mhapxeam tannem
Souzalinachea “Sam Fransis Xavier” tiatrant vantto
ghelo. Ho tacho nimanno tiatr. Uprant to duent zalo.
19 Mars, 1970 hea disa to Moddganvchea hospitalant
ontorlo.

M.Dodan Konknni machier kel’lea vavracho ugddas
sodankall urtolo.

Tachea atmeak Devan sorginchem sukh favo korum.

 
=====
Roddon Fugar Zatam

I
Sarachem moder kusonk ghatlear voktar tem kusonam,
Tech porim ublolo kapus to eka zagear bosonam,
Amorechea vellar nodor marxi tor suria asonam,
Tech porim amchem nennarponn hea tempar disonam.

Kor
Adle purvoz amche mele, punn te girestanche chole,
Goribanchem rogot pion te advogad dotor zale,
Sangtam mhunn tumi ragan bhortole,
Punn te xenkdde pasar zale, gorib kallokant uronk —
guneanvkari bhattkar vortole

II
Zannar-nennar him utram mhojim motint dovrat ghott,
Eka goribacho cheddo Goeam iskol xikot tor,
Girest mhonnta taka iskol kiteak, amger sirvisek
dovor,
Amchea cholea borim kheltolo ani jevtolo pott bhor.

Kor
Roddon fugar hanv zatam; amchea kustar bhorlim pottam,

Goribamni nixttur bhattkarank pikoun dilim xetam
Goribank dakhoilim rotam, punn gorib voir sorle atam
Teach goribamni tea bhattkaranchim viktim ghetlim
bhattam.

III
Vet-bhor Goa xar put tuje asat chearui nortinim
Toxech xikonaslele karpinter-fitter huxar artinim,
Toxe xikonaslole xetkamti xet roun pot bhortat aplech
partinim. Toxech xiklele advogad juiz korti haloitat
kortinim.

Kor
Ixtta chintit tor tuvem mostok zata ragachem toem
Goenchea bhattkaramni fuddarak armosanv marlam kaem
Ixtta, chintit tor tuvem sangchi goroz na hanvem,
Goenchea bhattkaramni padd kelam Goem.

Ghoddpi ani Gavpi: M. Dod de Verna
 
{Article by Brazinho Soares, Kalapurkar - text and
pictures courtesy of: Gulabonline).