John
Gomes (Kokoy) John Gomes, zaka Konknni palkar ollkhotat mhonnon Kokoy to Dezembrachea 2rer 1937 vorsa Kunkolle zolmolo. To ek boro composer, boroinnar te xivai ek potrkar. Kokoy poiloch Konknni palkar dixtti poddlo tachea mamachea Caetaninho Rebello, hachea tiatrant, zachem nanv aslem "Konversanv Dogam Ateu Princeza Cheddvanchem ani Perigisanv Tancher Tanchea Paichem. Tiatrantche 100 vorsanche ithisant hem ek sogglem porom vhoddlem tiatranchem nanv, oxem maka dista. Hea tiatrant Kokoy, hannem ek clown mhunnllo, zaka don-tin pavtti apoilo. Tea uprant tannem Pri. Pedro Xavier Osorio, hachea tiatrant bhag ghetlo, zo tiatr Goenchea sabar svantancher zalo. Aiz mere to sumar 500 bhurgeanchea ani 'professional' tiatramni nhesla. Tea kallachea famad digdorspi: Anthony D'Sa, Prem Kumar, Seby Coutinho, Robin Vaz, Milton Fernandes, Tom Jon Dias, hanchea tiatramnim Kokoy nhesla. Famad tiatrist Kid-Young-Rod, Mendes-Ferrao, Prem Kumar, Souzalin, Jacint Vaz, A.M.B. Rose, Effie, Cecilia, hanchea sangatak to palkar disla. Tannem apli choddan chodd duettam mhonnllim Cecilia, Philomena, Cynthia ani Veena, hanchea sangatak. Duo mhunnpak Eddie Mascarenhas tacho uzvo hat aslo khuim. 1955 vorsa SSC pas kelea uprant Kokoy Bombaim ailo ani poilench nattok "Ingrati Bhoinn" Vakola nachlo. Professional palkar taka haddpi zaun asa Vincent Semedo. Kokoy, hannem Robert Mascarenhas, hacho "Maim ani Put Zhoi Tuzo" ho tiatr digdorxitt kelo, zantun tannem mukhi part keli, je vorvim to tiatr-pollenaranchim kallzam jikhonk pavlo. Kokoy tiatr boroitalo, ani tannem sumar 17 tiatr boroileat ani palkar dakhoileat, zantle famad mhollear: "Atancho Sonvsar", "Devacho Hukum Padricho Ghutt", "Guneav Konnacho", "Dubhav", "Porikxa" ani "Fukott Charlie". Tannem sumar 3 hozar voir kantaram ghoddleant, jim tannem gaileant ani dusreai tiatristank gavunk dileant. Apleam gitancheo tannem don kesetti kaddun dovorleat - "Sopon" ani "Goem Apoita".  Kokoy ek potrkar vortoulo ani Bombaimchea toxe Goenchea soglleam potrancher ani masikancher to boroitalo zoxe porrim "Vauraddi", "Soth Uloi", "Goa Mail", "Goan Sports Weekly", "Sot", ani "Cine Times. Kokoy vortouta akaxvannicho kolakar, ani Goenche toxe Bombainchea Akaxvnnir tacheo zaiteo kariavolli aileat ani ietat. "Bokanvancher Gozali", "Udhorgotiche Vatter", nattkam ani kantaram to akaxvannir ditalo. Tech porim durdixnneancherui tancheo kaim kariavolli aileat. Kokoy, Zuari Agro Chemicals, he komponnint nokrek asa ani Moddganv aplea kuttumba sangatak jieta. Questions or Comments? Please write to us
at: thegoanreview@goa-world.com Special
Thanks for the arrangements: Gaspar Almeida |
| |||||||||||||||||||||||||||||||||||