ANTONETTE & ROMEO MENDES

 

Antonette Mendes mull ganvan Vhoddlem Goem, punn tem zolmolem ani vaddlem Bombaim ani atam aplea kuttamba sangatak Bandra ravta.  Fattlim 33 vorsam Konknni palkar tem dista.

1960 vorsa tem poilech pavtt Konknni palkar dislem aplea paichea, A.K. Dsouza, hachea tiatrant "Aum To Tarvotti".    Antonete-ak tiatrant nhespachi bilkul khoyi nasli, punn tachea bapain taka forsan 
mhonnllelea porim aplea tiatrant ghatleam, je vorvim uprant tem yaunk pavlem ek bhou prozollit nokhetr Konknni palkachem.  Survatek palkar tem Marie Antonette nanvant aillem.

Antonette, hannem nhoich fokot bhumika keleat, bogor tannem apleam kantaram vorvim tiatr-pollenaranchea kallzannim apleak ek kherit yogo mellounk dovorla. Eka kallar tiatr pollennar tacher pixe zatale, ani tem aplem git gavpak palkar bhitor sortanch talliancho pavs korun taka ievkar ditale.  Konknni palkar tachem poilem git zaun assa "Naum Mhojem Escolas".  Konknni film "Amchem Noxib", hantun tannem gailelem omor ugddasachem git mhollea "Tum Nasloi Punn Tuka Sweater Kori", jem tem Anthony Mendes, hache vangdda gaita. Tachim her hit kantaram zaun asat "Pitti Pitti Mog", "Pixem", ani "Bebdem".

Tendnachea ani atanchea akanth digdorspi J.P. Souzalin, Kid Boxer, Master Vaz, C. Alvares, Prem Kumar, Alfred Rose, M.Boyer, adi., hanchea tiatranim tem nheslam.  Tacheo chodd apurbaiecheo bhumika zaleo Prem Kumar, hachea "Angounn", M. Boyer-achea "Sounsar Sudhorlo", Kid Boxer, hachea "Fuddar", heam tiatramni. Tech porim Jose Rod, hannem halinch palkar haddlelea "Mauli" non-stop show-ant tannem bes bori bhumika kelli.

Antonette, hannem "Abgath", "Tum Saiba Konn", ani "Khuinchem Mhojem Ghor?".  He tin tiatr boroun palkar dakhoileat, te xivai aplea pain boroilolo "Dilolo Jurament", ho tiatr tannem digdorxit korun palkar dakhoilo.

Konknni cholchitram "Amchem Noxib" ani "Nirmonn" hantun gavpa xivai tannem bhumika keleat.  Jagdis Narulla, hachea "Mohabat Zindagi Hai", hea Hindi cholchitrant tannem vinodi bhumika kelea.

Antonette, hannem Konknni palkar khup khumika kealt ani gitam-i gaileant, punn tacheo kherit bhumika mhollear dukhest parti (tragedies) ani partintle dukhest "Cant".  Kaim tiatramnim tannem gailele osle Cant tiatra-pollennaram modhem omor ugddasachea zaun geleat.

Gavpant, tannem jinsavar bhesamni gitam gaileant, zaun Fulwalichem, nisterkarnichem, bebdeeachem, vinodhi, dukhest avoichem, adi.  Halim bhair sorteleam choddan chodd Konknni kesttimni tacho avaz aikonk mellta.

Antonette, hannem tiatr nhespak Afrikek, Inglanddak ani Gulf dhesamni bhonvddeo kelea.  Tachim gitam atam cassettincher, rikorddancher, akaxvannir aikunk melltat.  Survatek Antonette Dsouza aslem tem Romeo Mendes, hache kodden logn zaun Antonette Mendes zalem. Romeo Mendes zaun asa bhou purvilo Konknni kolakar, yo bhurgeponnich Star of Assnora nanvan kantorist koso Konknni palkar ailolo.  Tacho bhav somplolo Anthony de Assnora tea kallar ek famad kantorist aslo.  Te ganvan Assnora, Bardez.  Uprant Romeo Mendes, hannem palk soddun dilem ani to maguir "Nirmonn" filmant dislo. Halinchea kallar to portun palkar distalo, punn tanchim chodd kantaram kesettincher aikopak melltat
ani Bombaichea durdixnnear to zaiteo kariavolli dita.
Questions or Comments? Please write to us at: thegoanreview@goa-world.com

Special Thanks for the arrangements: Gaspar Almeida
with Fausto V. Da Costa. {Amchea kerit dhinvas Gaspar
Almeida ani Fausto V. Da Costa-k) - Goa-World Team
(Kuwait).