Aileat tumi ieat-ieat patrao, bosat goribachea bankar
Okosmat ievnchem poddlem nhoi, matxeam zatlem kustar
Ghorcheank gomoitam, tumchea boreaponnan asat tim sukhar
Tumchi toknai kortat titli thoddi, porot bhik magunk lokachea dharar
Gavantlea soglea rostear ekui fond bilkul disona
Bizlea kambear sodanch uzvadd, kednach kallok asona
Bhurgim amchim khuxeal asat bandleat khella moidana
Nollant zori bhaxen udok danvta chukon pasun sukhona
Konn sangta tumi broxttachar (1) korpi mhonn?
Sokalchea dova baxen nitoll ontorskonn asta tumchem
Porjechea duddvani bandleat bongle mhollem konnem?
Tumchea matear asta Goenchea sudaropachem vojem
Dongravelea panchvi(2) zhaddank tumi udkant ximptat
Dekhunuch thoimchi zanvaram kedea ganvani distat
Tumi nodivelea pulachea khabeank ghott dhorun asat
Tea khatiruch bosivelean devun porza cholun votat
Tumi Goem sarkench adhunik(3) kelam, amchi porbim tumkam
Doriak vochpachea vatter hotelkarani bandleant durgam
Soimbik doria vell disona atam distat fokt bildigam
Xant gavant, hotelachea mellsanin, bhitor sorleant kimsam
Tumi ekuch zagear astat, makdam bhaxen udkeo ghenant
Hea khatiruch nov vorsa modem tera pavtti vechnnuko zaleat
Rajkanni(4) angostram galunuch zolmotat, nagddea zolmank ienant
Hakach lagun monxeak irlixi loz mhotleli asa, hem tumi visorleat
1) Corruption 2) Greenery 3) Modern 4) Politicians