Kristak Porot Khursar Khillaitat

Niallanche somdirant jivitacho arso polletana

Motlobponachi karnni dolleam mukhar aili

Ontornskarnache tagdden mhellim kortubam zogkttana

Khursar; mon’xache patkani khillaileli murti disli

Ek Dev khoim To ! Monisponnache rupan sonvsarant ailo

Borem-vaitt jivitacho marg xikovnk laglo

Pangle-thontteank, kurdde-bhereank boro kortalo

Sandlele xelliancho To ek boro gonvli aslo.

Kallkhantlean uzvadda lagim vhorpi borea mon’xeak

Razacho Raza mhonnon mathear kanntteancho mukutt ghalo

Xanti ani peleache mogachi bori vatt dakoitoleak

Dogam choram modem ghalun khursar khillailo

Hea gozalik khup-khup vorsam bollandun ghelim

Ponn amchi mhellim kortubam azun chalu asat

Khursar morun amche mull patkachi soddvon zali

Disache disa vaitt karnneani Kristak porot khursar khillaitat.

Tuje bhavak ragache nodrean polleta tedna

Jezuche horddear zal’lo gavo porten ugtto zata

Tuje peleak onitache foddant lotun uddoitana

Jezuchi povitr murti rogtache dukhani roddunk lagli

Lino B. Dourado