NIMANNEM UTOR Bor: Miguel Braganza

AMKAM SOMZONA TOCH DEVCHAR

Goeant protek ganvant devchar asta. Ganvchea devcharachi bhas ami somzonanv punn tachem mon amkam kollon ieta. Ganvchea ghaddiacher vo ostorecher tacho bhar ieta ani tachea kornam to amkam aplem mon kolloun dita. To devchar porki nhoi, to amchoch, to amchea ganvcho devchar!

1975 voros poriant Tamil Nadu prodexan Hindik ek porki bhas koxi lektalet. Magir Kamal Hassan eka Hindi cholchitran disti poddlo. Tache fattafatt Sridevi, Jayapradha, Rajnikant ani her kolakar Bollywood filmamnim disti poddunk lagle. Atam Tamil lokan Hindi bhas porki mhunnpachi anink urlam? Tankam Hindi bhas atam aplich bhas koxi dista.

1560 vorsa Akbar patxaian polloil'lem ki Farsi ani Urdu bhasamnim Bharotachem raj cholloupak kottin mhunn. Tannem budvont Birbalak vangdda gheun “Hindoostani” bhas toiar keli. Farsi, Urdu, Bhojpuri, Hariani ani Panjabi, heo soglleo bhaso bhorsun ek novi bhas toiar zali. Vidvan Farsi-Arbi lipent gelea xekddea poriant Hindi boroitalet. Fattlea xekddeanuch Hindik devnagrint borovpak nett dilo. Punn attam ami somzotanv devnagrich tichi soimbhachi lipi mhunn.

Thoddeam budhvontank dista Romi ek firngi lipi. Tem khorem. Punn devnagri lipi amchea soimbhachi mhunn te amkam sangtat. Hem soth zalear ami-i firngi zale! Devnagri lipi-i amkam ostomptechean aileli. Ek lipi ghoddear boson aili ti Ariani loka sangatak. Dusri lipi aili tarvantlean, Purtugezam borobor. Itloch forok! Amchea soimbhacheo lipi mhunnllear Goem-Kannadi, Modi, Tamil, Malayalam, Kan'nad, Pali ani Prakrit. Sonskrut lipi pasun amchea desant pordexich. Farsi lipi tori amchea xezareach lipi; punn nhoi devnagri. Atam heo soglleo lipi ami apnnailea, ani teo amchea umonnantlea mirsange porim amcheoch zaleat.