| KOSLICH
MALIS NASTANAM
Bor: Daniel F de Souza |
|
GOEM
SANTOSH TROPHY-CHE OSTAD!
Dor
eka Goenkarachem sopon purem zalem. Goem Rajeachea futtboll pongddan
60vea Santosh Trophy Rashtriya futtboll xevttachea khellant sezarchea
Maharashtra pongddacher Kochi hanga zoit vhelem, ani Goenkaranchem
boll futtbolachea moidannar kitlem mozbhut tem ak'khea desak pottovn
dilem. Goenkar 'Fish-Feni-Football' heam tinui xetramni 'powerful'
mhunn amkam sogott pachartat. Tor, hea zoita vorvim Goenkarancho
futtbolacho 'power' kitlo to soglleank dislo. Ikra zann vinchun
kaddlole Goenkar thuim moidannar aplea rogtachem udok korun zhuzle
khore, punn tannim 13 lakh odhik Goenkarancho man rakhlo ani amkam
obhiman haddlo. Xebaski kopit Samir Naikak ani tachea sangateank,
toxench Goenchea pongddacho coach Maurice Afonso hankam. Xebas!
Jedna xevttachea khellant Climax Lawrence-an penalty bhair marli,
tedna TV-cher pollovn dor eka Goenkarachem kalliz bond poddonk
pavlem astelem. Punn, xevttak moidanar ek chomotkar korun Goenchea
pongddan soglleanchim kallzam jikhon ghetlim. Punn teach Climax
Lawrence-an 'semi-final' khellan nimanneam tin minutank Manipura-cher
zo zogllavnnea porim gol marun Goem pongddak xevttachea khellant
zago sugur kel'lo, to gol khuincho Goenkar visortolo? Tea gola
vorvinch Santosh Trophy-che xevttache ostad zaunk Climax Lawrence-an
ek sopon teach vellar rongoil'lem. Ani xevttak legun hem sopon
sakar korunk tacho-i vhodd hat-bhar asa.
Hea xevttachea zoitak oglli ghoddsan ani vhoddik karan, Samir
Naik ani Climax Lawrence hankam soddle zalear, her soglle futtboll
khellgoddi poilech pautt eke raxtria spordhent khelltale. Punn
dor eklo khellgodi khas kopxi ani huxarkai aslolo aslo.
Hea zoitachi ghoddsan ani khuxallkai oglli, karann pondra vorsam
uprant 'Santosh Trophy' porot amche Goenche bhuimier pavli. Hache
poilim Goencho futtboll pongodd panch pautt tori xevttachea khellant
pavlolo. Punn durdoivan tankam nimnno sankhov par korpak panchu-i
pavtti ies mevlench nam. Hea vorsak matr hea novea futtbol pongoddan
Goenkaranchem nanv futtbola moidanar bhangarachea letranim kantoilem.
Goencho coach Maurice Afonsan hache poilim don pavtti ek khellgoddi
koso Santosh kop jikhun nanv dovorlam, ani he pavtt to ek coach
koso tich trophy jikhun, apleak anik eka unch panvddear vhorunk
xoklo. Goenkaram modhlo ekloch zo poilo ek khellgodi ani uprant
ek pongddacho coach mhunn Santosh Trophy jikhunk pavlo.
GFA-an fattleam kaim vorsank khub bhor ghalun vavr kel'lo nodrek
ieta ani kherit ponnim lhan bhurgeank, mhunnllear Jr. khellgoddeancher
tanchem loxk mottea promonan ghatlolem disun ieta. Hea borea vavrachim
follam aiz te chaktat. Heach nettan Jr. khellgoddeancher ogllem
lokx ghalear ani tankam favo tem coaching dilear fuddarak Goem
futtbol moidanar amchea desant aplem raj choloitelem ani tancho
hat konnacheanuch dorunk zanvchonam hachi amkam purai khatri asa.
Ani nimannem ekuch sangchem mhunnllear dor ek Goenkar atam 'National
Football League' ji Janerak savn survat zanvchi asa, tachi dolleanim
tel ghalun vatt polleta. Itle mezgotin 'Goa Cricket Association'-an
Fatordachem Nehru moidan apleak kriketi khatir rakhun dovorchem
mhunn 'Sports Authority of Goa' hanchem kodde magnnim ghalea.
Abril mhoinean Bharot ani Inglandd hanche modhem zavpachea khellam
khatir Janerak thavn moidan addavn dovrun futtbol mogiank khell
polleunk nakarop, hem sarkhem nhoi. Goenchea futtboll mogiancher
hi ek vhodd on'neai zateli. Nehru moidan kherit futtboll khellam
khatiruch ubharlolem ani sod'deak Goem Bharotant futtbolache ostad
mhunnttoch, Nehru moidanar NFL futtbola khatir poilo ani voilo
zago diunk GFA-n aplo hokh rakhun dovrunk goroz. Tor Goencho khellam
Montri Bab Pandurank Modkoikar hacher aplem lokx ghalun, aplo
xevttacho nirnnoi ghetanam NFL spordhe babtin Goenchea futtbol
mogiank niraxi korchonam mhunn ast bhalgitam.
Daniel
F. de Souza,
e-mail: dannyboy04@rediffmail.com
danielf@sancharnet.in
