OGRLEKH
07-21 DEZ 2005
VORS 1; ANK 2
KONKNNICHO ANINK EK TALLO

KONKNNI mogiank khas korun Romi lipient Konknni borovpeank ani vachpeank amcho maie mogacho nomoskar. “GOENCHO ULO” hea pondralleacho dusro ank tumchea hatamni ghaltana amkam khub khos bhogta. Romi lipientle Konknni bagent ani ek ful fulta. Romi lipientlea Konknni mollbar ani ek noketr udeta. Hem ful odhik pormollunk, hem noketr odhik porzollunk tumchea sohokarachi khub goroz asa. Ho tumcho sohokar amkam jerul melltolo mhonn ami as ballgitanv.

GOENCHO ULO hem potr zolmant haddpak karonn kitem? Goenkar, Goeant ani Goeam bhair asat te, azun porian Romi lipient Konknni bhas vachtat. Azun poriant Konknni bhaxecho mog ani umallo tanchea kallzamni asa. Ho Konknni bhaxecho mog ani ho umallo Goenkaram bhitor jivo urlearuch Goeant Konknni bhas urtoli ani Konknni bhas aslearuch amchem Goenkarponn astolem. GOENCHO ULO hem potr Goenkaram bhitor Konknni bhas ani tiche vorvim Goenkarponn okhondd korunk proitn kortolem.

Konknni bhaxek ek ithias asa. Romi lipientli Konknni bhas hea itihasacho ek motto bhag. Konknni bhaxechi udhorgot Konknniche Romi lipientle buneadicher adarloli asa. Hech buneadicho adar gheun ami Goem rajeant Konknni bhaxek ticho manacho zago melloun gheunk chollvoll keli ani zoit melloilem. Punn khottea noxiban Romi lipientle Konknni bhaxecher add nodor ghali. Haka lagun Romi lipient boroitoleank ani vachtoleank khub luksann zalem hantum matui dubav na. Romi lipientle Konknni bhaxek favo tem sthan ani man mellounk, Romi lipient Konknni bhas boroitoleanchi ani vachpeanchi seva korunk hem nemallem zolmak ailam.

GOENCHO ULO hea nemalleachi bhas sarkhi sompi ani khoincheai Goenkarak somzota tosli astoli mhonn sangpak amkam khos bhogta. Amchea sadea jivitant ji Konknni bhas ami uloitanv, ani ti uloun dadhoxi zatanv, ti bhas hea nemalleant ami vapurtoleanv. Konknni bhas borovpache nem’ monant dhorun ho vavr ami fuddem vhortoleanv. Hem nemallem vachtana tumkam tem aplench potr koxem disunk zai, hem amchem intesanv. Hem intesanv monant dovrun hem potr amchea jivitacho ek bhag korunk amche proitn astole.

Amche Goenkar, Goeant asat tache poros chodd, Goeam bhair asat. Bharatachea anek prantamni ani sonvsarachea anek desamni te ximpoddlole asat. Hea sogllea Goenkarank ekvottit kortolo zalear ekuch upai asa ani to mhonnlear Konknni khatir Romi lipi vapurchi. Sonvsarachea chearui kon’xeamni ximpoddlolea Goenkarank Romi lipi bhes bori eta hantum dubav na. Hoch faido gheun Romi lipi Konknni khatir vaprun Goem ani Goenkaram bhitor sombond odik ghott korunk ami vavurtoleanv.

Konknni monis Bharotachea chear prantamni ximpoddlole asat. Te Konknni bhas Romi, Devonagori, Kon’nodd, Farxi ani Molyallom lipiamni boroitat. Konknni bhaxechi udorgot ekvottan korchem kam Romi lipi vaprun borem korum ieta. Soglle Konknni porjek ekvottit korpachem GOENCHO ULO –chem soponn asa. Hem soponn sakar korunk ami pott’tiddkin vavurtoleanv.

Tea xivai GOENCHO ULO Goenchea rajki, somajik, dhormik, xikhxonnik, sonvskrutik ani heram mollancherui apli xidduk nodor dovortolo. Sotak ani nitik xabaski ditolo ani fottik ani onitik virod kortolo. Dhoveak dhovem ani kalleak kallench mhonnpak amkam obhiman bhogtolo.

Goenkaram modem, disan dis thoddo zait veta to Konknni bhaxecho mog ani disan dis viron veta tem Goenkarponn sambhallunk, tem odhik fulounk ani follaunk GOENCHO ULO pramannikponnim vavurtolo mhonn tumkam bhas ditanv.

Hea vavrant tumcho sohokar astolo mhonn amkam khatri asa. Romi lipientle Konknni bhaxeche sevent tumi-i hat bhar ghaltoleat mhonn ami as ballgitanv.

Zoi Konknni! Zoi Goa!! Zoi Bharot!!!

Tomazinho Cardozo

LAHN DIVLI, VHODD UZVADD

Goanche bhuienr anink ek divli pettli mhonn Konknni mogiank khuxalkai bhogta. Konknnicho vavr bhuzar ghevop ek sompem kam' nhoi! Mhojea tor onubhovant, hanv zannam Konknni bhaxe pasot ghatlolo poiso sompeponnim vosul zaina. Ani hem sot astana torui he amche bhav Konknni maim khatir fuddem sorleat tika porot khand marun vhoir kaddpak.
Hea vellar goroz nhoich duddvanchi, punn chodd goroz novea-novea Romi Konknni borovpeanchi. He nove boroupi ami nirmann korunk zai. Ani hea kamak hem rongit Goencho Ulo pondrallem, fuddem sortelem mhonn somzotam.
Vachpeank ugddas astolo, mhozo ixtt bab Domnick G D'Souza, hachea sompadponna khala, hanv Konknnicho Darvontto nanvanchem mhoineallem porgott kortalom. Ho Darvontto duddvanche oddchonnik lagon cyclostyle rupan xapun ietalo. Ami hem mhoineallem 1979 vorsa suru kel'lem ani tem neamit oddez vorsam pasun chol'lem. Amkam duddvancho adhar naslo, bhogor hanga-thoim kaim jahirati ami ekttaitalet ani he porim tem Kepem, Moddgonvam, Ponnje ani Mhapxeam xaramnim book-stall-ancher vikrek dovortale. Punn vikre udexim kainch faido mellonaslo. Kaim pavtti Mhapxeam thavn Moddganv vochon fokot 20 rupia zoma korun portotale. Tedna ami kitem kelem ani kitem mevlem, hem chintinastana fokot Konknnichea moga pasot korit. Punn obhimanan sangchem mhonnllear ami kitle-xech nove torunn Romi Konknni borovpi toiar kele. Aiz heanch noveam borovpeanchi amkam goroz. He nove pillgechea kallzamnim ami Konknni maincho mog rigounk zai.

ALFONSO BOND BRAGANZA,
Mhapsa.

Mogall Miguel ani Sangati,
Thanks to the Almighty, your dream has become a reality. Finally, a new newspaper, in the format of a tabloid, which is going to be a Konkani fortnightly, in Roman script for all Konkani lovers.
Hope your dreams flourish and this tabloid becomes popular amongst all Konkani lovers and it attains the status of a daily newspaper.
Tuka ani sogle je vaur kortat her potrak tankam mhojim un-unit porbim ani Devan tumcher aplem besanv ghalchem.
Ji divli tunvem pettoilea ticho prokas fankumk Zankam Konknni iena, tannim tozvit korunk. Zor eka ghorant GOENCHO ULO sogleanim vachunk ani Konknni Bhaxek mogan Man diunk. Viva Goa. Viva Konkani.

Jerry Fernandes,
Riyadh / Aldona

EK LAHN PANVL, EK VHODDLEM DHEMP

Novembrache 24ver Goencho Ulo zolmolo, eka borea muhurtar, Goenchea Saibachea novenachea ani IFFIchea poilea disa. Ponnjechea Azad moidana samkhar, TB Cunha vosreant, Konknni borovpi ekttovle. Hea novea potrachi ugttavnni Ullas Buyanv hanchea hatantlean zali.
“Jednam avoin marlo ulo…” oso rosall tallean gavpi Ullasan ulovn oxem sanglem, “Amchea borea noxiban Konknnik nespak panch lipio asat, punn thoddeam bhasank ekui asona.” Komi sonkhen ulovpi bhasank (Minority Languages) sovloti melltat tosleo sovloteo Konknnink mellunk zai.
Tomazinho Cardozo, amchea sol'lagar sompadpean survatechea utramni hea pondralleachi fuddli chal ani panvll sothak fuddo korun astelem mhunnon sanglem. Khuinchei bhaxen ani lipin boroilear amkam pavta, karann ami lipi vad monank laun ghenanv, oxem Miguel Braganza, amchea potrachea dainamean mhunnllem ani rattvollint kosli bhor ghaltolo tacher nodor voddli.
Sompadpean soglleanche abhar mandle.
Hanga amim lovkik borovpi Ben Antao (Canada) hache vhodd upkar attoitanv. Karann, tannem soddsoddit denngentleanuch 30 hozar rupia pattovn, amkam hem potr uzvaddavpachem dhaddos dilem.
Goencho Ulo uzvaddak aila ti khoxechi khobor gomona fuddem, ixttamnim, vachpeamnim ani Konknni mogianim xubhitxa divn amkam nirop vo rekad pattoileat. Thoddeanchim nanvam hanga ditanv.
Novembrache 26ver Mhapxenchim ani atam Purtugalak ravpi Livia/Jorge de Abreu Noronha moipas@netcabo.pt boroitat:
“Porbim tuka ani sogleam mhojeam bhavank anik bhoinnink. Amche bhaxecho mog asa tankam. Tumcher sogleancher Devan axirvad ghalcho. Bravo anik Viva Konkani.”
Tech tarkher Mhapxenkar Roland Martins, Goa Desc goadesc@sancharnet.in, boroita:
”Novea Konknni pondralleak porbim. Amkam 30 tori proteo rakhun dovor, karann, soglleam Consumer Forums hankam vanttunk zai.”
Novembrache 27ver Mungllurcho Mumboi ravpi Ancy S. D'Souza Paladka ancyds@gmail.com boroita:
“Porbim. Ek Romi potr uzvaddavn tumi ekdom' borem kam’kelem. Mungllurcheam Konknni lokacho, chodd korun sahitikancho sogllo tenko tumkam bhasaitam. Dor Konknni mun'xak pavpacho tumchea potracho dhei asa dekhun, fuddem sorat. Soglle Goenkar Konknni khatir ekach bavttea khal ekttonv.”
Teach disa Canada ravpi Goenkar Bosco D'Mello bospam@gmail.com boroita:
“Goencho Ulo potrak sogllem iex anvddetam.”
Kuwait thavn Gaspar Almeida Goa World Website www.goa-world.com hannim Goencho Ulo potrak internettacher proxidhi dilea.
Novembrache 28ver, Inglanddak ravpi Vaskukar ani World Konknni Day Gazovpi Rene Barreto goanint@yahoo.co.uk hannem amchea potrachi khobor [Goans_Tanzanite] vangddeank pattoilea.
Dil'lik xikpi, Purtugalk ravpi Fontainhaskar "Constantino Hermans Xavier" constantinox@hotmail.com boroita:
“Hanv khoroch torno ani Konknni titli bori nokllom. Punn tumim zababdarent hea potrachem kam hatant ghetlam dekhun tumkam xebaski. Hanv xikpi ani chodd duddvankar nhoi, punn tumkam Goencho Ulo fankovnk koslich mozot korpak hanv sodanch raji, chodd korun Purtugalak ravpi Goenkaram modhem. “Itleam zannanche bore anvdde aslear amchea proitnank jerul foll ani iex melltelem mhunnon amkam khatri asa. Tumche borpavollintlean ani sohokarantlean amchea potrachea vikasak tumim hat-bhar laitele mhunnon ami axen ravtanv.