SANTOSH TROPHY Goenkaranchem gonngonnit zoit

PONDRA vorsam gamelea uprant Goenchea futtbol pongddan Santosh Trophy novean ghora haddli ani hangasor soglleank anondbhorit kele. Novembrache 21ver zalelea khellan Goenkaranim Maharxttrachea pongddak 3-1 golank haroilo. Zorui xevottacho ankddo vhoddlo dista, torui punn jikhpak titlem sompem naslem. Karann, survek Mhaxttrachea Socorr Velhon poilo gol kelo to Goenchea Felipe Gomesan batoilo. Goenkaramni penalty kick mell’leli tivui bhair marli ani golla fuddlean ghusponk lagle. Fokot extra vellan pavtoch Climax Lawrence ani Joaquim Abranches hannim toplelea golanchea bollan Goenkar iesvoxit zale.

Xevotta khell pollopak Goencho Khellacho Montri Pandurang Madkaikar, MLA Francis Silveira and GFAcho sekretar Savio Messias hajir asle. Madkaikaran jikpi ttimichea 24 vangddeantlea dor khellgaddeak ek lakh rupianchem inam bhasailam. Tachea bhair GFA dor ekleak 10,000 rupia hea zoitak lagun diteli. Ostadponn jikun Goenche ttimin All India Football Federation-a koddleanui 5 lakh rupia zoddlea, ani hea inamantlei dor eka khellgoddeak 15,000 rupia melltole.

Keralachea Malayalam Manorama famad potran Goenchea Nicholas Rodriguesak he spordhecho boreantlo boro khellgoddi mhunn vinchun kaddla.

Hea vorsachea Santosh Trophy zoita udexim Mauricio Afonso don torencho Goencho futtbol khellgoddi zalo. 1983 Kolkatta ani 1984 Chennai jedna hem kop Goean haddlelem tedna to sogleant huxear khellgoddi aslo, zalear he pavtti to Goenchea pongddacho coach aslo.

FONTAINHAS GAZOILEM Goenche Kolek Sfurti, Daizak Adhar

HEA vorsachem Fontainhas Festival of Art IFFIk zoddunuch aslem. Novembrachi 26 ti Dezembrachi 3ri tarik poriant he atvech torechea mhaotsava udexim Goenche kolek, songitak, ani daizak borich bhor poddli. Fontainhas mhonnllear ek nazuk, nodren bhorpa sarkho Ponnjecho vattar. Heram zagear atam disona toslim sobit, pornim ghoram hanga eka-mekak tenkun, oxir rosteanche degek ubhim ravleant. Hea xarachem hem girest daiz sambhallpak, ti konnaiche nodrek poddunk vorsa-vorsa Goa Heritage Action Group (GHAG) ho khuxalkaiecheo mellavo ghoddovn haddta.
Fontainhas-acho lok hea suvalleachea kallar aple vosre, galeri ani ghoram chitrakola dakhovn diunk raji zatat. Konnachea angnnant, bolkamvant, vosreant, mallear, adi, Goenche umedvont kolakar torek-torechim aplim chitram prodorxonnak dovortat. Jitlo pollovpeank kolecho surngar pollovn sontos bhogta, titloch sontos kolakarankui bhogta. Na tor itlo lok tanchim chitram kedna polloitolo aslo? Pollovpeam koddlean tust-thoknnai zata tantuntlean tanchea chitravpachea kamank vaddtti sfurti ani pattimbo mellta. Torek toreche pollovpi thoim pavta ani chitram viktim legun gheta.
Hanga pollovnk mellta chitram, fottu, matiechem ani her bhov minutichem kam. Rostearui chitram, bavleo, nazuk vostu dakhovpak toxeo vikrek dovorleo distat. Rosteancher rongit dive ani bonderam. Konn hat chitraitat, tondd chitraitat, adi. Ak'kea vattarak Mahotsava kallar veglloch rong bhorlolo dista. Tachea bhair sanjechea vellar suvadik songit hea nam tor tea konnxeak aikonk mellta. Goenche poramporik dovli-mandd, divli-nach, Konknni nattok, poramporik brass band, ani her prokarui nodrek poddtat.
Khavpacheo vostu tor komi nanch. Torek-torechim ruchichim khavpam ani pivopank lagun bhurguim toxim zanttim bhultat. Sanj khorich bhov movjechi hanga heam disamnim. Fontainhas-achim zanttim-nenttim khuxal zatat, karann, koslea tori niban lok hanga pavon sorta. Zantteank kitem nam kitem umedichem dista, ani zaiteam zannancheo porneo iadi paletat, jednam hansop-khellop-gavop-nachop hanga chukonastana choltalem. Oslo veglloch songom', veglloch onbhov ani Goeant nhoi tor khuinchorui goddovn haddpak ekdom kottin.
Vochot thoim kolakar - Rajendra Usapkar, Nirupa Naik, Neela Bandodkar, Rosy da Silva, Yolanda D'Souza, Neela Bandodkar Rodrigues, Harshada Kerkar-Sonak, Shilpa Mayenkar, Carla Alvares, Vithal Naik, Vasudev Shetye, Hitesh Pankar, Pradip Naik, Tanya Mendonsa, Sonia Rodrigues Sabharwal, Subodh Kerkar, Senby Jose Akkara, Vamona Navelcar, Shaistah Thapar, Ivan D'Souza, Norman Tagore,Siddharth Gosavi, Savio Peres, Loretti PintoChandan Gaonkar, POrakash Sidnal, Gauri DivanShireen Mody, Namanand Modak, Ajay Gulati, hannim soglleanim apleam nazuk chitrancher prodorxonn kelem. Savlle-chitrakar Alex Fernandesachi kola veglli tosoch vixoi. Tannem jive asleleam zantteam tiatranche kheritponnim fottu kaddle, tor Thomas Vaz ani Prasad Pankaran hancheam fottvancher ganvgirea Goenchi niz sad ani othom porzolltalo. Daniel D'Souza bonsai zaddancho eksonnim sundor baguch rochleli mhonno-ieta.
Heta Pandit, Raya Sankhawalker, Cesar Pinto, Ajit Sukhija, Miguel Braganza, ani Harsh Budkuley jitle umedin ho suvallo ghoddovn haddtat tem pollovn ek ojeapuch dista. Karann sogllem korche korun thoim futt ghalpi, adde bandpi ani osle her toreche gondoll rochpi ghunvot astat. Mon’xachea such-sontosachi devcharak pasun nosai asta, mon’xakuch kiteak? Torui GHAG osleam addkollink bodona punn huxarkaien ani umedin sukh-sontos posravpacho vo ekdom vegllo mellavo ghoddoun haddtta Goenchea khaxelponnachi tust korta.