SUFFOLAICHE PANVDDE,
TORNATTEANCHE ANVDDE

Sanj zali. Begim begim hanv prasar pavun sorlom ani Moddgonvchi bos dhorli. Punn jitle taktiken hanv ailolom, title taktiken hanv Agxi pavpacho naslom karann amchi bos porvot choddlolea porim khorxeun - khorxeun dhanvtali. Hi bos mhatari zalea oxem hanv udgarlom ani teach vellar amchi bos okosmat thambli. Bosi mukhar gaddianchem bhirem aslem jem lohu- lohu fuddem vetalem. Khoim tori obghat zala mhunn dubhav nastanam sangonk zatalem. Ani toxench ghoddlolem. Xirdona pavtoch rostea-khuxik ek pulsar amkam disli. Ticho sarkho ibadd zal’lo ani tanki pasun nikollun poddloli. Eke gaddiecho itlo nas zalo zalear gaddi choloitoleachem kitem zalem zait? oso proxnn mhojea monant ailo.

Khupxe obghat zatat, khupxe lok rosteacher hea sonvsarak fatt kortat ani obghatak sampddun ontorloleam lokam modem, tornatteanchi sonkea soglleanvon chodd. Khoim dhanvtale kai he tornatte? Khoim pavunk zai aslem kai tankam? Xevottak khoim pavle te? Amcheach ganvant, vaddea-vaddeamnim zonnzonnit varea porim motorcycle-i dhanvtat. Rosteavelo lok khuim dhanvta kai ho? mhunntat . Punn motorcyclekar ‘dhoom macha de’ ho sur gaitat.

Motorcycle sovkas choloun umed mellonam ani rosteacho dhunvor kaddlea xivai motorcycle hatant ghetloli mhunn disonam. Zonnzonnit varea porim bhonvop, tontonnit adsora sarke muscle dakhovop, T.V. model-am porim nhesop, kensancher il’lo so rong ghalop ani huskea vinnem jieupacho aichea tornatteancho hetu. Tornnem rogot fokot ek ghoxtt manta, ti mhunnllear ‘No Fear! No Rules’ – bhirant nam, kaide nam, donui dobeant. Aichea tornatteank zai svotontrtai zai tem korunk, zai thoim bhonvunk, zai tem nhesunk, zai titlem-i aple muttint dhorunk. Zaitim sopnam te sopnettat ani jednam chintnam xarti pavonam, tednam niraxi zatat. Heach karonna pasot aiche tornnate xikunk fattim, punn mouza marunk fuddem. Let’s party guys! Let’s rock! Oxem te udgartat. Xikon konn feliz zala? ho proxnn tanchea monant khellta ani xikop nastanam such bhogpacho rosto sogott zana - tarvar vo Londonak voch ani ‘kar lo duniya mutthi mein’.

Sufollai vo “success” zaun asa aiche pillgecho mantra. Sufollai mhunnllear kitem gai? Poixe! Money spells success. Tum sukhi asum vo nasum, tum Dev bhirantin jieum vo folgam marum, tuka xikop asum vo nasum. Poixe aslear monis tu! Poixe aslear savkar tu! Poixe aslear successful tu!

Poixe sogllench nhoi ‘Money cannot buy everything’ oxem thodde zantte vagtale punn ‘without money can anybody survive?’. Aicho sonvsar duddvancher cholta. Poixe aslear pulis tujea bolsant, soirim tujea darant, ixtt tujea ghorant ani xezarim tujea angnnant. Poixe aslear tujean vhoddlo bopko marunk zata, zai te bhaxen nhesunk zata – Denim vo Levi jeans, funky t-shirt, Nike vo Reebok shoes, Jockey underwear, pormollit cher, hatak Omega ghoddial, ek mottem mascot toxich golleant ek sorpolli, bolsant latest model mobile phone ani ganv gazoitoli ek bullet vo Chevrolet Tavera ani sogllo lok ‘dekhte reh jayenge’.

Aiche pillgek sufollai zai, punn tras gheunk naka, ‘success’ zai punn ‘hardwork’ naka, karann ami “ready-made” sonvsarant jietat. Ek button damblear michinantlean coffee ieta, internet-ar ek button dambun tujean Amerikechea bazarant shopping korunk zata. Ek button amchim sopnam sakar korpi mixinachi atam ami vatt polletat. He babtint hanvem tornatteanchea nanvan Christmas father-ak ek SMS dhaddla ani to amkam toslem mixin haddtolo mhunnon tachea ienneak axeun ravtam.

“Christmas father io io, Christmas father io
Sogllim bhurgim anondan, vatt polloit asat”